તારી યાદ એવો સુરજ છે જે રાત્રે પણ ઢળતો નથી
તારા વગર તો મને મારો પડછાયો પણ જડતો નથી.
ઘર કરીને બેઠું છે મનની ભીતર એકલતાનું અઠંગ અંધારું
પ્રગટાવે રોશની નવી એવો કોઈ દીપ ઝળહળતો નથી.
આગીયાથી ઉધાર લઈને આગ હું રાત અજવાળું પણ
અંધારી છે રાત તોય એક આગિયો પણ મળતો નથી.
વાદળે ચાંદની છુપાઈ ગઈને રાત પણ છે બહુ ઉદાસ
ઇચ્છા મારી પૂરી કરવા એક તારો પણ ખરતો નથી.
હકીકતની હથોડીએ દીધા છે ડામ એવા દિલ પર કે
પવન પાંખો આપે તોય હૈયાનો હંસ ઉડતો નથી.
જોઈ જોઈ છબી તારી ગુજરી જશે આયખું આખું
મનમાં વસેલી મુરતને સમય ખંડિત કરી શકતો નથી.
જોડાણ હૃદયથી હૃદયનું અનુભવાય છે હૃદયને
અંતરથી અંતરના સંબંધને કદી ફરક પડતો નથી .
– દીપા સેવક..